Yakkasaroy tumanida xotin-qizlar o‘rtasida “Quvnoq startlar” sport musobaqasi bo‘lib o‘tdi

Bugungi kunda yurtimizda xotin-qizlarga bo‘lgan e’tibor va g‘amxo‘rlik davlat siyosatining ustuvor yo‘nalishlaridan biri bo‘lib, ularning jamiyatdagi o‘rni va faolligini oshirish, salomatligini mustahkamlash, bo‘sh vaqtlarini mazmunli tashkil etish borasida keng ko‘lamli ishlar amalga oshirilmoqda.

Aynan shunday ezgu maqsadlar yo‘lida Yakkasaroy tumanida xotin-qizlar o‘rtasida sog‘lom turmush tarzini targ‘ib qilishga qaratilgan “Sportni sev, sport bilan yasha!” shiori ostida ikkinchi marotaba tuman hokimi tomonidan “Quvnoq startlar” sport musobaqasi tashkil etildi. Mazkur tadbir tuman markazidagi “Do‘stlik” bog‘ida bo‘lib o‘tdi.

Musobaqada tuman maktablari va maktabgacha ta’lim muassasalari xodimalari, tibbiyot sohasi vakillari, mahallalardagi xotin-qizlar faollari, yoshlar yetakchilari, shuningdek, “Inson” ijtimoiy xizmatlar markazi xotin-qizlaridan iborat jamoalar ishtirok etdilar. Tadbir do‘stona muhitda, yuqori kayfiyatda va sport ruhida o‘tdi.

Tadbirda Yakkasaroy tuman hokimi Nilufar Allabergenova, hokim o‘rinbosarlari, mahalla faollari ham ishtirok etib, musobaqa ishtirokchilariga ruhiy ko‘tarinkilik ulashdi, ularni qo‘llab-quvvatladilar.

Qiziqarli va murosasiz kechgan bellashuvlar yakunida:

1-o‘rinni tuman maktablari jamoasi.

2-o‘rinni davlat maktabgacha ta’lim muassasalari xotin-qizlar jamoasi.

3-o‘rinni mahallalardagi xotin-qizlar faollari jamoasi qo‘lga kiritdi.

Shuningdek, “Inson” ijtimoiy xizmatlar markazi xotin-qizlari hamda tibbiyot sohasi vakillaridan tuzilgan jamoalar tuman hokimining tashakkurnomasi bilan taqdirlandilar.

Mazkur sport musobaqasi nafaqat sog‘lom turmush tarzini targ‘ib etish, balki ayollar o‘rtasida do‘stlik va hamjihatlik rishtalarini mustahkamlash, ular orasida sog‘lom raqobatni shakllantirishga xizmat qildi.